قصيدة ام قصر للشاعر حازم السهلاني

لم قصر وديّت جوع اهلي بظرف

من سبانه العوز وانباك الخدر

احنه مسبيين اجينه عله الجرف

والملك لله نملك بس صفر

الطيور تموت يمنه شماتفوت

تصوري من الجوع ظل يطلع عطر

اكل بينه بكل كتر جوع وعذاب

وتالي رد الجوع اكل حته الكتر

حته كلب العيد حن عله الزغار

يم قصر تدرين ظل ليمت يمر

شاف ماكو هدوم كص من عمره عام

وظل يجيهم بين كل فطر وفطر

كوّه كمنه نجلّب بجذر الحياة

وهيه حفنة عوز ويهدنه الجذر

يم قصر فكيلنه ابواب القصر

علت شمس الجوع والدنيه ظهر

ليمت تمديلنه فياي الخبز

بينه وبين الحرك حسبة شبر

جعنه حد الموت يابنت الدلال

وكل شموخ بيوتنه تحول كصر

حط عليهن دود ذنّي العاليات

وكبل فوك بيوتنه يحط النسر

صرنه تالي الليل نغفه عله الدروب

واحنه جنّه انام بيهه من العصر

يم قصر وادم لهسه عله الخيام

ماخجلتي من الخيم وانتي ام قصر

استحي من ابطونه وردي السؤال

ولج.... انتي منيلج هذا العهر

والله لو رجال عندج ادباج

ويحفر الماي ويسويلج كبر

عدهه شرم الشيخ فله وفندقين

وتارسه حلوك الشعب منّه مصر

وخصرج من الخير يسمن عالجروف

وبالمقابل للشعب يضعف خصر

اكثر من الدم صفت بينه الجروح

واجن يمج يم قصر كلهن خضر

واليداوي جروحنه يحصل ثواب

مايحصله المؤمن بليلة قدر

والله مدري اشلون فرانه الزمان

وصرنه بحساب الشهر ليلةو اجر

صرنه ليلة اجر من هذا العظيم

ولازم تداوينّه الحد الفجر

طب ستر نسوانه بقصرج دخيل

وكاعد الجوع عله جرفج يتنظر

وموسنة لوعه شعب لوعه اجاج

فنّج تسوينهه بهذا العصر

مو مثل بدر الرميّض بالعطاء

انتي لو تنطين سمّوج ام بدر

بوكت ماعدنه حضن نلتم عليه

انتي بحضان الغرب صدر بصدر

الجان ماعندج خوال ولا عمام

انه رايح يم قصر لبنج قصر

راح اكلّه امّك خذوهه اخلاف ابوك

وهسه حبله وخلّفت مدري اشكثر

خايب امّك دنكت راس العراق

استكعدوهه الغربه من تالي العمر

احترك مايج كون انتي وماي ابوج

ويشب خيرج للسمه وينزل جمر

المومس العمياء كاتبهه عليج

وجان مايقصد شخص غيرج بدر

والله.. لو مينائج بنهر الفرات

جا كسرنه ضلوعج بجسر النصر

جنّه نعذر بيج بأيام الحصار

وهسه كلّش يم قصر ماظل عذر

لوتفكين القصر ونطب عليج

لو تجين نفكلج ابواب الكبر

لأن مايرضاهه رب العالمين

شعب عايشله بكبر وانتي بقصر